2Ti 3 | WSK | STEP | Bare ni imi agotala ko ikiko: Tom nukum te ikup bibiya aratukko.

2 Timothy 3

Tom nukum te munan memek duap duap aratukko

1 Bare ni imi agotala ko ikiko: Tom nukum te ikup bibiya aratukko. 2 Kariimet nunga saki me nunga kuemonko, am nongota nunumi la ko kuemonko, ale manga mel ko tawun biya kuemonko. Nuna nusupuling lagara ko munan te kualala namomon ale nunumi nunup patawomonko. Nuna saki alo den memek nunga manarmonko. Nuna nunam nonet nuguring bowa ningi me bagomonko. Nuna bo amilmil tumonko mena, se munan kako mu ko nguangara bo nongote mena tala. 3 Nuna nongomang aora biya se saki alo nongomang me nungarmon, ale nunumi ko memek me siwumonko. Nuna saki alo nunga balu maguwumonko. Ale nongota nunga bagara aolak me ko sinar tamonko. Mena. Nuna saki alo nunga ninguru moa maguwumon, ale munan ningo nuam suen la mu ko nongomang magurukko. 4 Nuna nunga sikisaki kager kari nuguting te nunga awumonko. Ale nuna ikia memek am ngual ko betemonko. Nuna nongota kari bibiya ko nunumi balmon, ale nuna ali imi ko munan, ko amilmil ko kuemon, ale Kaem mu me ko kuemonko. 5 Nuna nungumik diwang te Kaem ko munan karo tumonko, bare Kaem ko sokel nunguningkiri nononga ningi aratukko me ko kuemonko. ^{▼▼2 Tim 3:5 Nungumik diwang te Kaem ko munan karo tua: Mark 7:6; Titus 1:16. Prophet kawel: Mat 7:15,21-23.} Se ni kariimet uwuta mu arungak me kapeterko, awar bagerko.

6 Nunga ningi saki nuna kariimet saki nunga kawam te namasan ale imet sikina nunga ikia nunga nongomang sokel mena wore nunga nongomang kulukursan, ale ikia kawel nunga kasursan. Imet ari umutang mu nongomang ikup karogo, ale ikia duap duap nongomang moawoso. 7 Nuna pempem la ikia tamonko negesan, bare nuna den nunguning ko ikimonko mu me terong. 8 Kari ilagala Jannes Jambres ilak nuna girakala Moses ilak nunumi iluman uwutatala ^{▼▼2 Tim 3:8-9 Jannes Jambres ilak nunga nunup Old Testament te me aniso, bare Juda alo balukasan mu kari ilagala mu Pharaoh koma te Moses ilak bitakasan ale kilek saki agotala bitakasan: Exodus 7:11,22.}, aitak kausa kawel kariimet imitang nuna Kaem ko den nunguning biriruwusan. Nunga ikia maingkala maga saparam, se nunga nongomang ningi nunguning mu kawel. 9 Bare nononga ikia bitawasan mu nunguning me aratukko. Mena. Mu am mena namurukko. Mu awuk, Jannes Jambres ilak nongote aratam iwitatala, kariimet suen la mu kariimet imitang nunga ikia memek tairatela aringimonko.

Timothy Kaem ko den ilukuawurokko Paul maonam

10 Bare ni ani agarkikasam, ale ni aga ikisam, ani den kariimet nunga kasursam, se aninga bagara aolak, se aga ikia betesam ale aga angamang aguwaya aniso mu ni ko ikisam. Ale ani angamang ningi nunguning se angamang sokel ago ikup gisam mu ni ago ko ikisam. Ale ani saki alo angamang nungarsam, ale aninga munan lila, mu ni ago ko ikisam. 11 Ani den gilalong yawara apukasam wore ko ikup suen biya gikasam mu ni am suen la ko ikisam. Ani Antioch, Iconium, se Lystra geragawakasam ale umu te agotala ikup gikasam mu ni ko ikisam tala. Bare Kari Biya ikup suen biya mu ningi aninga bataguru tam. ^{▼▼2 Tim 3:11-12 Paul ikup gikaso: Acts 13:50; 14:5,19. Kris alo ikup gimonko: John 15:20.} 12 E awiriya nu Jesus Kristus te diram la bagurukko kueruk, mu nu uwutatala ikup suen biya giwurukko. 13 Bare kariimet memek se prophet kawel mu nuna kariimet nunga kulurmonkowo. Se aking Satan punga geraguk mu aking nuna nunga kulokko, betela, betela, mu te nononga bagara aolak mu eng biyala maga kapurukko.

14 Bare ni mu den ka manorman se ikiem ale ko gemang ningi nunguning aram mu ninguru ilukuawurko. Mu awuk, ni ana kari arikaya den sumu nika kasurman mu ni ana ninguru nanga ikisam. 15 Mu ni kuriang gotek la baga se Kaem ko den batoga te aniso mu ko ikiem. Kaem ko den mu ni ikia nunguning ka kausok se Jesus Kristus ko gemang ningi nunguning aruk se te Kaem ka sangaru taukko terong mam. 16 Kaem ko batoga suen la mu Kaem ko Korang Bur te aratam, ale nanga sangukko yawarakala. Mu den kawel wetang te beteso, ale den nunguning nanga kasurso. Ale nangata nanga memek nanga kasurso, ale kilek diram Kaem ko kueso mu ago nanga kasurso. ^{▼▼2 Tim 3:16 Kaem ko den: Rom 15:4; 2 Peter 1:21.} Umutang te ana Kaem ko ura ilu se munan ningo ningo betenakko mu terong maman.

17